ತುಳು ಬದ್ಕ್ಡ್ ಮಾಮಿ ಮರ್ಮಲೆ ಸಮ್ಮಂದೊ ಮಲ್ಲವು. ಅಕ್ಲ್ ಎಂಚ ಇತ್ತೆರ್ ಪನ್ಪುನವು ತುಳು ಕತೆ ಕಬಿತೆಲೆಡ್, ಸಂದಿ ಪಾರ್ದನೊಲೆಡ್ ಗಾದೆ ಎದುರು ಕತೆಕ್ಲೆಡ್ ಅಲ್ಪಲ್ಪ ಕೇಂಡ್ದ್ ಬರ್ಪುನ್ಡ್. ಈ ಮಣ್ಣ್ ಡ್ ಮಾಮಿ ಮರ್ಮಲ್ ಎಡ್ಡೆಪ್ಪುಡು ನಡತ್ತೊಂದಿತ್ತಿನ ಕತೆಕುಲು ನಂಕ್ ತೋಜಿದ್ ಬರ್ಪುನಿ ಒಂತೆ ಕಮ್ಮಿಂದೇ ಪನೊಡು. ಮಾಮಿ ಅಂಚಗೆ ಮರ್ಮಲ್ ಇಂಚಗೆ ಪನ್ಪುನೆನೇ ನಮ ಕೇನುವ ಅತ್ತದೆ ಎಡ್ಡೆ ಮಾಮಿಗೆ ಎಡ್ಡೆ ಮರ್ಮಲ್ ಗೆ ಪನ್ಪುನೆಕ್ಕ್ ದಿಂಜ ಸಾಕ್ಷಿಲು ನಂಕ್ ತಿಕ್ಕಯೊ. ತುಳು ಜನಪದ ಸಾಹಿತ್ಯೊನು ಗರ್ತ್ ತೂಂಡ ಅಪ್ಪೆಲೆಕ್ಕಂತಿನ ಮಾಮಿ ತುಳುವೆದಿಗ್ ತಿಕ್ಕ್ ದಿತ್ತಿನವು ನಂಕ್ ತೋಜಾಂದ್. ಮಾಮಿಗ್ ಮರ್ಮಲ್ ಮಲ್ತಿ ಕೆಲಸ ಬೋಡಾದುಪ್ಫು, ಮರ್ಮಲ್ ಪೆದ್ದಿ ಬಾಲೆ ಬೋಡಾದುಪ್ಪು, ಆಂಡ ಮರ್ಮಲ್ ಬೋಡಾದುಪ್ಪಂದ್.
ಅಂಚಾಂಡ್ಲ ಈ ಸಾಹಿತ್ಯೊಡು ಅಪ್ಪೆ ಮಗಳ್, ತಗೆ ತಂಗಡಿ, ಅಮ್ಮೆ ಮಗಳ್, ಅಮ್ಮೆ ಮಗೆ, ತಮ್ಮಲೆ ಅರ್ವತ್ತೆ, ಅಪ್ಪೆ ಮಗೆ ಈ ಸಮ್ಮಂದೊದ ಕತೆಕ್ಲೆಡ್ದ್ ಮಾಮಿ ಮರ್ಮಲ್ ಕತೆಕ್ಲೆ ಎಚ್ಚಿಗೆ ತಿಕ್ಕು. ಮಾಮಿಗ್ ಪತ್ತಂದಿ ಮರ್ಮಲ್ ಆಲಾಂಡ ಆಲ್ ಮಾಮಿಗಾವಂದಿ ಮರ್ಮಲ್. ಅಕುಲೇ ಓಲ್ಲಾ ಒಟ್ಟು ಸೇರುದ್ ಇತ್ತೆಂರ್ಡ ಮಾಮಿ ಮರ್ಮಲೆ ಮೇಲೊ ಆವು. ಆ ಕುರಿ ಪೋತಿ ಕುಂಬುಡೊಗು ಈ ಚೆಟ್ಟ್ ಪೋತಿ ತಾರಯಿ ಆವು. ಮಾಮಿಡ್ದ್ ಮರ್ಮಲ್ ಜೋರುಂದಾಂಡ ಆಲ್ ಇಲ್ಲ್ ಡ್ದ್ ಮಲ್ಲ ಮುಟ್ಟಿಕಲ್ಲ್. ಮಾಮಿನ ಪಾತೆರೊ ಕೇನುನಾಲ್ ಅತ್ತ್ಂದಾಂಡ ಆಲ್ ತಮೇರಿ ಮೀರಿ ಪೊಣ್ಣು. ಸೂಂಠಿ ಕೈಪೆ ಚಟ್ನಿ, ಸಂಬರಮೀರಿ ಕಜಿಪ್ಪು, ಸೋರ್ಕುದ ಸಿರಿ, ಮೇಲೊದ ಮಂದರೆ, ಪಾಪದಾಲಾಂಡ ಮನಿ ಮಂಬುದಾಂತಿನಾಲ್, ಮಂತ್ರ ಜಾವದೆ.
ಅಡ್ ದ್ ಬತ್ತಿ ಪೊಣ್ಣನ್ ಮಾಮಿ ತಮ್ಮಲೆ ನಡಪವೊನ್ನ ರೀತಿ ರಿವಾಜಿಲೆ ಮರ್ಜಿ ಕೆಲವು ಕತೆಕ್ಲೆಡ್ ಉಂಡು. ದುಂಬುದ ಕಾಲೊಡು ವಾ ಇಲ್ಲಾಂಡ್ಲಾ ಮಾಮಿನವೇ ಎಚ್ಚ ಕಾರ್ಬಾರ್. ಮರ್ಮಲೆ ದೃಷ್ಟಿಡ್ ತಮ್ಮಲೆ ಒಂತೆ ಎಡ್ಡೆಂತಿನಾಯೆ ಆದುಪ್ಪುವೆ. ಅಲೆನ ಸಾಲ್ ಡ್ ಉಂತುದು ಆದೆರ್ದ್ ಪಾತೆರುನಾಯೆ ಆದುಪ್ಪುವೆ. ಆಂಡಲಾ ಉಂದುಮಾತ ಮಾಮಿನ ಜೋರುದ ಇಡೆಟ್ ನಡಪ್ಪಂದ್. ಅಂಚಾದ್ ಮಾಮಿಗ್ ಪೋಡಿತ್ತ್ ದ್ ಬದುಕೊಡಾಯಿ ಮರ್ಮಲ್ ಆಲ್. ಎಚ್ಚ ದಾಯೆ ಕಂಡನ್ಯೊಟ್ಟುಗು ಪಾತೆರುನ, ತೆಲಿಪುನ, ನಲಿಪುನವು ಮಾಮಿ ಕಣ್ಣ್ ಗ್ ಬೂರುಂಡ ಆಲ್ ಮಗನ್ ಮರ್ಲ್ ಕಟ್ಟವುನಾಲ್, ಬುದ್ದಿ ಹಾಲ್ ಮನ್ಪುನಾಲ್, ಅಂಚಾದ್ ಅಲೆಗ್ ಎಚ್ಚ ಸ್ವಾತಂತ್ರ್ಯ ಇಜ್ಜಿ. ಪಂಡಿಬೇಲೆ ಪಾಡಿನುಪ್ಪು ಪಂಡಿಲೆಕ್ಕ, ಆಲ್ ಲಕ್ಕ್ಂಡ್ಲಾ ಆವಂದ್ ಕುಲ್ಲುಂಡ್ಲಾ ಆವಂದ್. ದಿಂಜ ತಗ್ಗ್ಂಡ ಬಗ್ಗಿನಾಯಗ್ ಒಂಜಿ ಗುದ್ದು ಎಚ್ಚ ಪಂಡಿಲೆಕ್ಕೊ. ಎದುರು ಪಾತೆರ್ಂಡ ದೊರಪತಿ, ಅಪ್ಪೆ ಇಲ್ಲಡೆ ಅಪಗಪಗ ಪೋಪುನಾಲ್ಂದಾಂಡ ಚಾಡಿಚರಳೆ ಕೊನೊಪುನಾಲ್.
ಒಂಜೊಂಜಿ ಇಲ್ಲಲ್ ಅರ್ದರ್ದ ಡಜನ್ ಡ್ಡ್ ಲಾ ಎಚ್ಚಿಗೆ ಮರ್ಮಲಲ್ಲು ದಿನ ದೆತ್ತೊಂದಿತ್ತಿ ಕಾಲೊ ದುಂಬುದವು. ಈ ಮರ್ಮಲಲ್ಲೆಗ್ ಇಲ್ಲ್ದ ಪಿದಯಿಡ್ದ್ ಪಿದಯಿದವೇ ಕೆಲಸ ಹೆಚ್ಚಿಗೆ ಉಳಯಿದ ಪಟ್ಟ ಮಾಮಿಗೆ. ಪಟ್ಟ್ ಬಳಸುನ, ಕೊರ್ಪುನ ಪತ್ತುನ ಅಲೆನ ಕೈತುಲಯಿ. ಒರೊರ ಕರೀಜ್ಜಂದಿನಪಗ ಮಲ್ಲ ಮರ್ಮಲೆಗೊ ಪಿರ್ತಿದ ಮರ್ಮಲೆಗೊ ಈ ಪಟ್ಟ ತಿಕ್ಕುನವುಲಾ ಉಂಡು. ಅಂಚಾಂದ್ ತನ್ನ ಮಗಳೆಲೆಕ್ಕೊ ಮರ್ಮಲೆನ್ ತೂತಿ ಮಾಮಿ ಇಜ್ಜೇ ಎಜ್ಜಲ್ಂದ್ ಪನ್ಯರೆ ಬಲ್ಲಿ.
ಕೊದಿ ಕಟ್ಟ್ ದ್ ಉಡಲ್ಡ ಆಸೆನೆ ಮನಸ್ದ ಬಯಕೆನ್ ನಿಂಗ್ ದ್ ಉಪ್ಪೊಡಾದಿತ್ತಿ ಸ್ಥಿತಿ ಅಲೆನವು. ಪನ್ಯೆರಾವಂದಿನ ಪತ್ಯೆರಾವಂದಿನ ಬದ್ಕ್ ಅಲೆನವು. ಆಡ್ದ್ ಬತ್ತಿ ಪೊಣ್ಣಗ್ ಕೊರೊಡಾಯಿನ ಹಕ್ಕ್ ನ್ ಅಡ್ಂಗ ದೀಪುನ ಮಾಮಿಯೇ ಆಲ್. ಇಲ್ಲ್ ಗ್ ಕಂಜಿ ಕೈಕಂಜಿಲೆಗ್ ಬುಳೆಸಲೆಕ್ ಕುಂದು ಬತ್ತ್ಂಡ ಅವು ಬತ್ತಿ ಪೊಣ್ಣನ ಬಾಗ್ಯೊಡ್ದು ಅಂಚಾಯಿನಿಂದ್ ಅವು. ನನ ಓಲ್ ತಿಕ್ಕ್ಂಡ ಒಂಜಿ ಪೊದು ? ಲಚ್ಚಣದ ಪುಚ್ಚೆ, ಒಡು ಪೊಗ್ಗಿಲೆಕ್ಕೊ, ಕೊಟ್ಟ ಪತ್ತಿಲೆಕ್ಕೊ, ಇಲ್ಲ್ ನ್ ಗುಂಡಂತ್ರೊ ಮಲ್ಪೆರೆ ಬತ್ತಿನವುಂದು ಕುರೆಕುಚ್ಚನದ ಪಾತೆರೊಲೆನ್ ಕೆನೊಡ್ ಆಲ್. ಕಣ್ಣನೀರ್ಡ್ ಕೈದೆಕ್ಕೊಡು ಆಲ್.
ಇಂಚಿತ್ತಿ ಬದ್ಕ್ ಡ್ದ್ ಪಿದಯಿ ಬರ್ಯರೆ ಪೊಣೆಪುನ ಮರ್ಮಲಲ್ಲುಲಾ ಉಪ್ಪೇರ್. ಉಳ ಕುಸೆಲ್ ಗೊಬ್ಬುದ್ ಕಣ್ಣ್ ತಪ್ಪಾದ್ ಅರಿಯಾ, ಬಾರಾ, ತಾರಯಾ, ಬಜ್ಜೆಯಾ, ಉರ್ದಾ, ಪದೆಂಜಿಯಾ ತಿಕ್ನೆನ್ ಒಂತೆ ದೆಂಗಾದ್ ದೀಪುನಲಾ ಉಂಡು. ಕಂಡ್ದ್ ಮಾರುನಲಾ ಉಂಡು. ಅರ್ಕಂಜಿ ದಿಕ್ಕೆಲ್ಡಾ, ಬಾರ ದಿಕ್ಕೆಲ್ದಾ, ತೂಟನ್ದಾ ತಿಕ್ಕ್ನೆನ್ ತೂಟು ಪಾಡ್ದ್ ತಿನ್ಪುನಲಾ ಉಂಡು. ಅಂಡ್ಯೆ ಪುಂಡಿಗ್ ಅರಿಕಡೆಪಿ ಪೊರ್ತು ಒಂತೆ ಬಂದೊನು ದೆತ್ತ್ ದೀದ್ ಬೊಕ್ಕ ತೂಟು ಪಾಡ್ದ್ ಕಂರ್ಚಾದ್ ತಿಂದ್ದ್ ಕೊದಿ ಕಲೆಪುನವುಲಾ ಉಂಡು. ಮರ್ಮಲೆ ಈ ಗುಟ್ಟು ಗೊತ್ತಾಂಡ ಮಿನಿ ಕತೆ ಮುಗಿಲೆಕ್ಕನೇ. ಇಲ್ಲ್ ಗುಂಡಂತ್ರ ಮಲ್ಪೆರೆ ಬೈದಿನಾಲ್ಂದ್ ಸಾರ ನೆರಡೆ ತಿಕ್ಕು. ಒರ ಅಲೆನ ತಪ್ಪು ಪಿದಯಿ ಬೂರ್ಂಡ ಬೊಕ್ಕ ಮೈತಿದಿಯಲ್ಲುಲಾ ಮಾಮಿಲಾ ಒಟ್ಟು ಸೇರ್ದ್ ನಂಗ್ದ್ ಮಂಡೆಗ್ ಕುಟ್ಟುಲೆಕ್ಕ ಏಪೊಲಾ ಕುಟ್ಟೊಂದುಪ್ಪೆರ್.
