ಬಾರ್ ಕುಟ್ಟುದ್ ಮಲ್ತಿನ ಅರಿನ್ ದಾಸ್ತನ್ ಮಲ್ಪರೆಗಾದ್ ಮುಡಿ ಕಟ್ಟುವೆರ್. ಅರಿ ಅಥವಾ ಧಾನ್ಯೊಲೆನ್ ಬಯ್ತ ಕಟ್ಟ್ ಡ್ ನಿರ್ದಿಷ್ಟವಾಯಿನ ಪ್ರಮಾಣೊಡು ಶೇಖರಣೆ ಮಲ್ಪುನವೇ ಮುಡಿ.
ಮುಡಿ ಕಟ್ಟುನ ತುಳುನಾಡ್‍ದ ಒಂಜಿ ವಿಶೇಷ. ಮುಡಿಟ್ ಅರಿತ್ತ ಮುಡಿ, ಬಾರ‍್ದ ಬಿತ್ತ ಮುಡಿ, ತೌಡುದ ಮುಡಿ, ಧಾನ್ಯದ ಮುಡಿ ಇಂಚ ಬೇತೆ ಬೇತೆ ನಮೂನೆ ಉಂಡು. ಸಾಮಾನ್ಯವಾದ್ ಮುಡಿಟ್ಟ್ ಪದ್ನಾಲ್ ಸೇರ್ ಅಳತೆ ಮಲ್ಪುನ ಕಳಸಿಗೆಡ್ ಮೂಜಿ ಕಳಸಿಗೆ ಪಾಡುವೆರ್. ಕೆಲವು ಕಡೆಟ್ ಪತ್ತರೆ ಸೇರ್‍ದ ಕಳಸೆಲಾ ಉಪಯೊಗ ಮಲ್ಪುವೆರ್.
ಮುಡಿ ಕಟ್ಟುನೆಟ್ ಬಾರೀ ಬಿರ್ಸೆರ್ ಉಲ್ಲೆರ್. ದುಂಬು ಬೈತ್ತ ದಪ್ಪದ ಮುದ್ದೆದ ಮುದೆಲ್‍ದ ಬರಿನ್ ಬಲ್ಲ್ ಡ್ ಬಿಗಿತ್ತ್ ದ್ ಕಟ್ಟುವೆರ್. ಒಂಜಿ ಮುಡಿತ್ತ ವೃತ್ತೊದ ಅಳತೆಗ್ ಸರಿಯಾಪುನ ಮೂಜಿ ಬೈತ್ತ ಬಲ್ಲ್ ದ ವೃತ್ತೊಲೆನ್ ತಯಾರ್ ಮಲ್ತ್ ದ್ ನೆಲತ್ತ ಮಿತ್ತ್ ದೀಪೆರ್. ವೃತ್ತೊದ ಮಧ್ಯೊಗು ಬರ‍್ಪಿಲೆಕ್ಕ ಬೈತ್ತ ಮುದ್ದೆದ ಕಟ್ಟಿದಿನ ಭಾಗೊ ಉಳಮೈಕ್ ಬರ‍್ಪಿಲೆಕ್ಕ ಮಲ್ತ್ ದ್ ಸುತ್ತು ಬುಡ್ಪಾವೆರ್. ಸರಿಯಾದ್ ದೀದ್ ಅಯಿನ್ ಬುಕ್ಕ ತಲುಬೈ ದಪ್ಪಡ್ ಪರಡ್ದುವೆರ್. ಈ ರೆಡ್ಡ್ ಪೊರೆ ದಪ್ಪಾವಾದ್ ತಂಗಲ್ ಆಯಿ ಬೊಕ್ಕ ಪಿದಯಿದ ವೃತ್ತೊದ ಬಲ್ಲ್ ನ್ ಮಿತ್ತ್ ಗ್ ಏರ್ಪಾದ್ ಪೂರ ಅರಿನ್ ಪಾಡುವೆರ್. ಬುಕ್ಕ ಕುದಂಟಿ ಪತೊಂದು ಅರಿ ಸರಿಯಾದ್ ಉಲಯಿ ಇಪ್ಪುಲೆಕ್ಕ್ ಬೊಟ್ಟುವೆರ್. ಮೂಜಿ ಉರುಂಟುದ ಬಲ್ಲ್ ಲೆನ್ ಸರಿಯಾದ್ ದೀದ್ ಬೈತ್ತ ಮಿತ್ತ್ ದ ಭಾಗೊನು ಉಲಯಿಗ್ ಮಡಿಪುವೆರ್. ಅಯಿತ್ತ ಸುತ್ತು ಬೈಟ್ ನೆಯಿನ ಬಲ್ಲ್ ನ್ ಸುತ್ತುದು ಸುತ್ತುದು ಬಿಗಿಪುವೆರ್. ಉಂದು ಗೋಲಾಕಾರದ ಮಲ್ಲ ಚೆಂಡ್ ದ ಲೆಕ್ಕೊ ಮಿತ್ತ್ ಒಯ್ತ್ ದಕ್ಕುಂಡಲಾ ಒಂಜಿ ಅರಿಲಾ ತಿರ್ತ್ ಉದುರಂದಿಲೆಕ್ಕ ವರ್ಷಗಟ್ಟಲೆ ದಾಸ್ತಾನ್ ಮಲ್ಪರೆ ಅಪುಂಡು ಇಂಚ ಕಟ್ಟ್ ನ ಮಡಿನ್ ಕುತ್ಯಟ್ಟಡ್ ದಾಸ್ತಾನ್ ಮಲ್ಪುವೆರ್.
